Юрт келажаги ёшлар қўлида, деб бежиз айтилмаган. Чунки, эртанги кунни илмли, ташаббускор ёшлар қуришади. Мамлакатимиз ёшларининг турли соҳаларда эришаётган улкан ютуқларини кўриб ҳавас қиласиз. Бу ютуқлар албатта, уларга қаратилаётган эътибор мевасидир.

Туман ички ишлар бўлими бошлиғи, подполковник Умиджон Икромов “Раҳбар ва ёшлар” учрашуви доирасида туманимиздаги ёшлар билан самимий очиқ мулоқот қилди.

–Бу учрашув расмиятчиликдан йироқ, эркин тарздаги самимий мулоқот, – деди У.Икромов. – Юртимизда ёшларга жуда катта имконият ва имтиёзлар яратиляпти, булардан оқилона фойдаланиш керак. Биз сизларга тўғри йўл кўрсатишга доимо елкадошмиз.

Мулоқот давомида туманимиз ёшларининг эришган ютуқлари, камчиликлари, туман ИИБ пробация гуруҳи ҳисобида жазо муддатини ўтаётган ёшлар, уларнинг қонуний манфаатларини ҳимоя қилиш, жиноятчиликка қарши курашиш борасида фикрлар билдирилди.

Учрашув якунида ёшларнинг қизиқтирган саволларига батафсил жавоблар қайтарилди. Шунингдек улар билан жиноятчиликка қарши курашишда бир тану, бир жон бўлиб ҳаракат қилишга келишиб олинди.