Туманимизда Ўзбекистон Республикаси Давлат мустақиллигининг 34 йиллигига бағишланиб “Ватан учун, миллат учун, халқ учун” шиори остида ўтказилаётган байрам тадбирлари бир-бирига уланиб кетяпти.

28 август санаси эсда қоладиган бўлди. Кундуз куни истироҳат боғида байрам сайиллари бўлиб ўтган бўлса, оқшом гала концертга уланди. Марказий ўйингоҳга минглаб юртдошларимиз йиғилди.

Байрам тадбирини туман ҳокими Дилшоджон Джалилов табрик сўзи билан очиб, шодиёна иштирокчилари ва уларнинг тимсолида барча туман аҳлини улуғ айём билан қизғин қутлади. Туман ҳокими мустақиллик, айниқса, кейинги йилларда мамлакатимизда, хусусан, туманда қурилиш, бунёдкорлик, қишлоқ хўжалиги ва ижтимоий соҳаларда, халқимиз турмуш фаровонлигини юксалтириш, ҳаётини янада яхшилаш борасида кенг кўламли ислоҳатлар олиб борилаётганлигини таъкидлади.

Байрам аввалида Ўзбекистон Республикаси Давлат мадҳияси янгради.

Тадбирнинг бадиий қисмини туман маданият бўлими бадиий ҳаваскорлари бошлаб бердилар. Таниқли эстрада хонандалари Жасур Умиров, Иззатбек Қўқонов, Нодирбек Холбоев томонидан ижро этилган қўшиқларга каттаю кичик жўр бўлиб куйлаб, рақсга тушдилар. Тўлиқ таъмирдан чиқарилган ўйингоҳдаги шароит, марказга ўрнатилган замонавий монитор байрам иштирокчилари руҳиятини кўтарди. Дилтортар қўшиқлар барчага байрамона кайфият улашди.

Байрам тадбири ўзига хос мушакбозлик билан якунига етди. Юртдошларимизга аъло кайфият ва байрам шукуҳини ҳадя этаётган тантаналар туманимизнинг барча маҳаллалари ва меҳнат жамоаларида давом этмоқда.

Яқинлашиб келаётган мустақиллигимизнинг 34 йиллиги барчамизга қутлуғ бўлсин!